Mewngofnodi
0800 854568
O 1 Rhagfyr 2022 ymlaen, bydd Deddf Rhentu Cartrefi (Cymru) 2016 yn newid y ffordd y mae pob landlord yng Nghymru – gan gynnwys ateb – yn gosod eu heiddo.
Bydd yn gwella sut yr ydym yn gosod cartrefi rhent yng Nghymru, sut yr ydym yn eu rheoli a sut yr ydym yn byw ynddynt.
Yn ystod y misoedd nesaf, byddwn yn rhannu rhai fideos a fydd yn esbonio sut y bydd y newidiadau’n effeithio arnoch chi. Ond mae yna un peth yr hoffem ei nodi’n glir – does dim angen i chi boeni.
Darllenwch y daflen hon sy’n hawdd ei darllen neu mae rhagor o wybodaeth i’w chael isod.
—
Ar bwy y bydd y Ddeddf newydd yn effeithio?
Bydd pob un o denantiaid ateb yn gweld rhai newidiadau:
- i’r modd y mae eu contractau’n cael eu darparu
- i’r modd y mae eu cartrefi’n cael eu cynnal a’u cadw
- i’r modd y maent yn cyfathrebu â’u landlord.
Bydd angen i ateb:
- gydymffurfio â’r Ddeddf newydd
- gwneud y diweddariadau angenrheidiol i’w eiddo a’i waith papur.
TenantiaidDan y Ddeddf newydd, bydd tenantiaid a thrwyddedeion yn cael eu galw’n ‘ddeiliaid contract’. Bydd ‘contractau meddiannaeth’ yn cymryd lle cytundebau tenantiaeth.
Bydd y Ddeddf newydd yn hwyluso trefniadau rhentu ac yn cynnig mwy o sicrwydd.
I ddeiliaid contract, bydd yn golygu:
- eu bod yn cael contract ysgrifenedig sy’n egluro eu hawliau a’u cyfrifoldebau
- bod y cyfnod rhybudd ‘heb fai’ yn ymestyn o ddau fis i chwe mis
- eu bod yn cael eu gwarchod yn fwy helaeth rhag cael eu troi allan
- bod ganddynt hawliau olyniaeth gwell; mae’r hawliau hynny’n egluro pwy sydd â hawl i barhau i fyw mewn annedd, er enghraifft ar ôl i’r tenant presennol farw
- bod trefniadau mwy hyblyg ar gael ar gyfer cyd-ddeiliaid contract, a fydd yn golygu ei bod yn haws ychwanegu neu ddileu enwau pobl eraill mewn contract meddiannaeth
LandlordiaidI landlordiaid, bydd yn golygu:
- System symlach gyda dau fath o gontract: contract ‘diogel’ ar gyfer y sector rhentu cymdeithasol a chontract ‘safonol’ ar gyfer y sector rhentu preifat.
- Sicrhau bod cartrefi’n ffit i bobl fyw ynddynt; bydd hynny’n cynnwys cynnal profion diogelwch ar y gwifrau trydan a sicrhau bod synwyryddion carbon monocsid a larymau mwg sy’n gweithio wedi’u gosod.
- Bydd modd i eiddo y cefnwyd arno gael ei adfeddu heb orchymyn llys.
Beth y dylwn i ei wneud nesaf?
Rydym am i’r broses bontio fod mor esmwyth ag sy’n bosibl i bawb, ac mae’n bwysig eich bod yn gwybod beth y bydd y newidiadau’n ei olygu i chi.
Rhwng nawr a mis rhagfyr, byddwn yn rhannu’r wybodaeth ddiweddaraf â chi’n rheolaidd am y newidiadau y gallwch eu disgwyl.
Gallwch gael gwybod mwy yn awr am sut y bydd y Ddeddf newydd yn effeithio arnoch.
Tenantiaid
https://llyw.cymru/tenantiaid-mae-cyfraith-tai-yn-newid-rhentu-cartrefi
Landlordiaid
https://llyw.cymru/landlordiaid-mae-cyfraith-tai-yn-newid-rhentu-cartrefi
