Canlyniadau Cystadleuaeth Arddio 2024

Fis diwethaf, bu Grŵp ateb yn dathlu enillwyr Cystadleuaeth Arddio 2024. Daeth ein cwsmeriaid ynghyd yn Oriel VC, Pennar i gwrdd â phobl eraill sy’n hoffi garddio ac i rannu straeon am eu hanturiaethau yn yr ardd hyd yn hyn. Cafwyd sgyrsiau bywiog wrth fwynhau’r wledd o frechdanau a chacennau a ddarparwyd gan staff Oriel VC, a chafwyd cyfle i fwynhau arddangosfa o waith caled pawb.

Cafodd tystysgrifau a thalebau eu cyflwyno i’r buddugwyr lwcus gan Mark Lewis, Cyfarwyddwr Gweithredol Cwsmeriaid. Rhoddwyd cydnabyddiaeth arbennig i Robert Hoggins am ei ddefnydd dyfeisgar o ddeunyddiau, ac i Terence Mather am ei fasgedi crog hardd. Aeth y wobr am yr Ardd Gyffredin Orau i Lys Dewi, a Vicky a Freddy Garton oedd enillwyr y Wobr Cyflawniad Rhagorol, sef categori mwyaf newydd ateb, a hynny am eu hymroddiad a’u hymdrechion wrth arddio.

Lluniau o’n gerddi buddugol

Meddai Mark: “Mae’n braf gweld cymaint o geisiadau newydd yn y gystadleuaeth arddio eleni, gyda llawer yn mynd â gwobrau haeddiannol adre gyda nhw! Diolch i bawb sy’n parhau i ofalu am eu mannau gwyrdd. Mae’r ardaloedd awyr agored hyn yn ennyn llawenydd, yn creu harddwch ac yn meithrin ymdeimlad go iawn o lesiant ymhlith y garddwyr a’u cymunedau.”

Meddai David Tovey, Pennaeth Cwsmeriaid ateb, wedyn: “Llongyfarchiadau i bawb a gymerodd ran yn y gystadleuaeth eleni! Mae’n ysbrydoliaeth gweld y mannau awyr agored anhygoel a grëwyd, nid yn unig i’w mwynhau gan y garddwyr eu hunain ond i’w gwerthfawrogi gan y gymuned gyfan hefyd. Daliwch ati gyda’ch gwaith gwych!”

Os ydych yn ystyried cymryd rhan yn y gystadleuaeth y flwyddyn nesaf, dyma’r adeg berffaith i ddechrau cynllunio. Wrth i’r dail ddechrau disgyn, mae’n gyfle gwych i ystyried sut y gallwch greu gardd arobryn gydag ateb!

Lluniau o’n noson gyflwyno