Mewngofnodi
0800 854568
Mae ein diben yn glir yn ateb: wrth i ni ymdrechu i ddarparu amgylcheddau saff, sefydlog a diogel, rydym hefyd yn cydnabod pwysigrwydd datgarboneiddio i greu cartrefi a chymunedau mwy iach.
Deall datgarboneiddio
Mae datgarboneiddio yn cyfeirio at y broses o leihau allyriadau carbon, yn enwedig o gartrefi ac adeiladau. Mae’n fwy na gosod cyfarpar ffansi a chasglu data; mae’n ymwneud â darganfod ffyrdd ymarferol, ystyrlon o’ch helpu i reoli eich defnydd o ynni a gwella eich amgylchedd byw.
Ein dull ni o weithredu: eich cynorthwyo chi ar hyd y ffordd
Yn ateb, rydym wedi ymrwymo i egluro datgarboneiddio. Rydym yn canolbwyntio ar atebion sy’n gwella ansawdd eich bywyd heb eich llethu. Dyma ein dull ni o ymdrin â datgarboneiddio:
- Adnabod tueddiadau
Rydym yn deall bod preifatrwydd yn bwysig. Ein nod yw dadansoddi tueddiadau cyffredinol mewn defnydd o ynni, er mwyn meithrin dealltwriaeth sy’n eich grymuso i wneud penderfyniadau gwybodus. Mae hynny’n golygu y byddwch yn cael cyngor wedi’i deilwra ynghylch sut i reoli eich biliau a sicrhau bod amgylchedd eich cartref gystal ag y gall fod heb unrhyw fonitro busneslyd.
- Ymateb i anghenion o ran tai
Mae gan bob cymuned heriau unigryw. Drwy ddeall yr anghenion hynny, gallwn ddatblygu atebion arloesol o ran tai, sy’n cyd-fynd â nodau lleol ar gyfer datgarboneiddio. Rydym yma i helpu, boed drwy welliannau sy’n hybu effeithlonrwydd ynni neu drwy fentrau sy’n cynnwys y gymuned gyfan.
- Grymuso cymunedau
Rydym yn cefnogi ymdrechion lleol i feithrin capasiti a hybu cynaliadwyedd. Yn ogystal â gwella cartrefi unigol, mae ein rhaglenni hefyd yn adfywio cymunedau drwy fentrau cymdeithasol, economaidd ac amgylcheddol.
- Cynorthwyo pobl agored i niwed
Rydym yn cydnabod y gall preswylwyr hŷn ac agored i niwed wynebu heriau unigryw wrth i ffyrdd o fyw newid. Mae ein strategaethau datgarboneiddio yn cynnwys atebion hygyrch sy’n helpu’r unigolion hynny i gynnal a chadw eu cartrefi, gan sicrhau ar yr un pryd eu bod yn parhau’n rhan o’u cymunedau.
Manteision datgarboneiddio
Efallai eich bod yn meddwl, tybed pam? Dyma rai o’r prif fanteision:
- Biliau ynni is: Drwy ddeall patrymau ynni eich cartref, gallwn roi cyngor ymarferol i chi ynghylch sut i leihau eich defnydd o ynni ac arbed arian.
- Amgylchedd gwell yn eich cartref: Yn ogystal â lleihau eich ôl troed carbon, mae gwelliannau sy’n hybu effeithlonrwydd ynni hefyd yn gwella lefelau cysur ac ansawdd yr aer yn eich cartref.
- Cydnerthedd cymunedol: Mae cydweithio er mwyn datgarboneiddio yn cryfhau gwead cymdeithasol ein cymunedau, ac yn eu gwneud yn fwy cydnerth a chynaliadwy.
Ymunwch â ni ar y siwrnai hon
Yn ateb, rydym yn edrych ymlaen at ddechrau ar y siwrnai hon tuag at ddatgarboneiddio. Mae ein hymrwymiad i sicrhau amodau byw gwell yn golygu y byddwn yn parhau i archwilio atebion creadigol sy’n diwallu anghenion o ran tai ac sydd hefyd yn meithrin cymunedau cynaliadwy.
Gyda’n gilydd, gallwn drawsnewid ein cartrefi yn fannau sy’n fwy effeithlon o ran ynni, sy’n fwy cysurus ac sy’n fwy caredig i’r amgylchedd. Gadewch i ni weithio gyda’n gilydd i gael effaith gadarnhaol ar eich bywyd ac ar y byd sydd o’n cwmpas.
