Beth yw ymddygiad gwrthgymdeithasol?

Ymddygiad gwrthgymdeithasol yw ymddygiad sy’n debygol o achosi anfodlonrwydd neu niwsans i unigolyn arall, sy’n cynnwys defnyddio eich cartref at ddibenion anghyfreithlon. Gall enghreifftiau o ymddygiad gwrthgymdeithasol gynnwys:

• ymddygiad swnllyd a/neu ddifrïol
• fandaliaeth
• graffiti
• ymddygiad sy’n codi ofn ar rywun
• bod yn feddw’n gyhoeddus
• gadael sbwriel ar hyd y lle
• tipio sbwriel yn anghyfreithlon
• defnyddio cyffuriau anghyfreithlon
• cŵn sy’n cyfarth yn ormodol.

Mae’n bosibl na fydd rhai mathau o ymddygiad, er eu bod efallai’n achosi niwsans i unigolion, yn cael eu hystyried yn ymddygiad gwrthgymdeithasol. Gallai’r mathau hynny o ymddygiad gynnwys, er enghraifft:

• parti neu farbeciw a gynhelir unwaith yn unig
• sŵn neu aflonyddwch sy’n digwydd yn anaml neu’n achlysurol
• plant yn chwarae
• ci neu gŵn sy’n cyfarth yn achlysurol
• peiriannau domestig sy’n cadw gormod o sŵn (e.e. peiriant golchi dillad, hwfer)
• mân atgyweiriadau a wneir i gerbydau
• achosion o hel clecs, gan gynnwys negeseuon ar gyfryngau cymdeithasol
• anghydfodau sydd wedi gwaethygu.

Os ydych yn dioddef ymddygiad gwrthgymdeithasol neu niwsans a achosir gan gymdogion, cysylltwch â ni i gael gwybod beth y gallwn ni ei wneud a pha gamau y gallwch chi eu cymryd i’w ddatrys. Llenwch ein Report anti-social behaviour er mwyn cwyno a chyflwyno adroddiad heddiw.

Pan fyddwch yn sôn wrthym am broblem sy’n ymwneud ag ymddygiad gwrthgymdeithasol neu niwsans a achosir gan gymdogion byddwn yn cynnig cyngor i chi, yn cymryd gwybodaeth gennych ac yn dweud wrthych pa gamau y gallwn eu cymryd i helpu i ddatrys y broblem.   I ddechrau, byddem yn argymell eich bod yn mynd ati eich hun i geisio datrys y broblem gyda’ch cymdogion, os yw’n ddiogel i chi wneud hynny.    Byddwn yn mynd i’r afael â digwyddiadau mwy difrifol sy’n ymwneud ag ymddygiad a gaiff ei wahardd, megis ymddygiad gwrthgymdeithasol a niwsans a achosir gan gymdogion, pan fydd gennym dystiolaeth a bod angen gweithredu.   Gallai tystiolaeth gynnwys recordiadau’r ap sŵn, cofnodion ysgrifenedig, ffotograffau neu fideos.   Ni fyddwn yn mynd i’r afael â mân ddigwyddiadau neu bethau sydd wedi digwydd unwaith yn unig, y mae’n hawdd eu datrys rhwng cymdogion.   Nodwch y gallai gymryd peth amser i gasglu tystiolaeth a gweithredu, ond byddwn bob amser yn cyfathrebu’n rheolaidd â chi drwy gydol y broses.    Ni fyddwn yn gallu datrys rhai problemau ar ein pen ein hunain. Byddwn yn gweithio mewn partneriaeth â’r heddlu, yr awdurdod lleol ac asiantaethau eraill i ymdrin ag achosion mwy difrifol o niwsans ac ymddygiad gwrthgymdeithasol, er mwyn gwneud ein cymunedau’n fannau diogel i fyw ynddynt.

Mae’r Ap Sŵn yn ffordd gyflym a hawdd o recordio sŵn sy’n achosi anfodlonrwydd a niwsans. Bydd angen ffôn ‘clyfar’ arnoch i ddefnyddio’r ap hwn, ac os oes gennych fand eang ni fyddwch yn defnyddio lwfans data eich ffôn symudol. Cyn i chi recordio unrhyw beth ar yr ap, rhaid i chi ffonio Canolfan Gyswllt Cyngor Sir Penfro ar 01437 764551 lle bydd rhywun yn nodi eich manylion ac yn cyfeirio eich achos at y Tîm Iechyd Cyhoeddus. Nodwch na fydd modd paru eich recordiadau â’ch manylion os na fyddwch yn gwneud hynny.  Ar ôl i chi lawrlwytho’r ap a rhoi gwybod i’r Cyngor, gallwch fynd ati ar unwaith i ddechrau recordio’r sŵn sy’n achosi’r broblem. Caiff y recordiadau eu lanlwytho’n syth i wefan ddiogel. Yna, byddant yn cael eu hasesu a bydd penderfyniad yn cael ei wneud ynghylch pa gamau gweithredu sy’n angenrheidiol. Gallwch wneud cynifer o recordiadau ag sydd angen – mae pob recordiad yn para hyd at 30 eiliad.