Mewn ymdrech barhaus i wneud mannau cymunedol yn fwy cynhwysol a hygyrch, bu Cyngor Dinas Tyddewi yn cydweithio’n ddiweddar â Gofal a Thrwsio Gorllewin Cymru, sef un o is-gwmnïau Grŵp ateb, i wella’r Parth Cymunedol sydd yng nghefn Neuadd y Ddinas. Gan gydnabod yr angen i wella mynediad, yn enwedig ar gyfer pobl ag anawsterau symud, aeth Gofal a Thrwsio Gorllewin Cymru ati i sicrhau bod modd i bawb fwynhau’r cyfleuster.

Cafodd y prosiect ei arwain gan Mike a Louis a fu’n gweithio’n ddiwyd am sawl wythnos – boed law neu hindda! Mae eu hymroddiad wedi talu ar ei ganfed, oherwydd mae’r ramp newydd yn ei gwneud yn haws o lawer i bobl fynd i mewn i’r Parth Cymunedol ac mae’n sicrhau bod modd i drigolion lleol ac ymwelwyr fel ei gilydd fwynhau’r cyfleuster.

Meddai Simon Mann, y Clerc: “Rydym wrth ein bodd â’r ramp newydd sydd wedi gwneud cymaint i wella hygyrchedd yng nghefn y neuadd. Mae’r gwahaniaeth y mae’r ramp wedi’i wneud wedi bod yn amlwg iawn adeg ein boreau coffi, yn enwedig ar gyfer pobl sy’n defnyddio fframiau neu gymhorthion cerdded.”

Pe baech chi, neu pe bai pobl yr ydych yn eu hadnabod, yn gallu elwa o waith i wella hygyrchedd, mae croeso i chi gysylltu â Gofal a Thrwsio Gorllewin Cymru i gael gwybod mwy.

Cyhoeddwyd 16/10/2024